ابو الهول وأم الهول ..... خزعبلات مصرية

أبو الهول وأم الهول 

 أم الهول ؟؟؟؟؟؟

نبدأ بأبو الهول الأول وهانوصل لأم الهول بعد كدا ، ابو الهول إحنا كلنا نعرفه و عارفين انه هو التمثال الكبير إلى على شكل أسد برأس آدمى بيحمى جبانة الجيزة 

وإسمه "حور إم آخت" و عرفنا إسمه من لوحة إسمها لوحة الحلم و دى بيرجع عصرها لعصر تحتمس الرابع 

القصة : أن الملك تحتمس الرابع الذي كان يصطاد بالقرب من أبو الهول شعر بالتعب وخر نائماً

وفى أثناء نومه حلم الملك بوحى يبشره بأنه إذا استطاع تحرير أبو الهول من الرمال فسيقدر له أن يصبح ملك مصر.

وقد أمر الملك بإقامة هذه اللوحة بعد حوالى ألف ومائة عام من حكم الملك خفرع تخليداً لهذا الحلم المبشر.

أبو الهول ميين هو أبو الهول ؟؟  

"حور إم آخت" هو

يعنى حورس فى الآفق الأسم ده مسجل على لوحة الحلم اللى موجودة بين قدمي التمثال و إلى إتكلمنا عليها فوق وظل معروف حور إم آخت إلى أن تم تحريف الأسم ووصل إلى أبو الهول 
وأبو الهول هو تمثال واحد يعود عصره إلى الأسرة الرابعة عصر بناة الأهرامات
ونؤكد مرة آخرى أنه يعود لعصر الأسرة الرابعة  

ليه التأكيد علشان مش يجى حد يقول دا من عصور ما قبل التاريخ ، ولا من عصر ما قبل الأسرات ، هانشوف دلوقتى إن الى فى الصورة القادهم هو ما يسمى نحت عصور ما قبل الأسرات 

لما كان المصرى بينقش أو بينحت ببدائية مش بحرفية ومثالية فى العمل ، وكان بيجنب نحت الملامح و ملامح الوجه تحديداً فى تلك الفترة ، إلا ما ندر ولم يبدع فى التمثال ليتحول من تصوير الملامح إلى لإبتكار لتحويل الشكل العام من رأس أسد لرأس إنسان

هل فى إعتقاد أى شخص أن تمثال بروعة و جمال أبو الهول أنه يرجع لعصر ما قبل الأسرات ؟؟؟؟؟ 

طيب وإلى عايز يرجعه لعصر ما قبل الأسرات يرجعه ليه ؟؟؟؟ 

"علشان يثبت نظريته إلى هى أيه ؟؟ إن ده أصلاً مش "حور إم آخت" و إن دا تمثال الإله "آكر 

مين هو الإله آكر

هو رب الأرض وهو معبود قديم عرف بالأسم المفرد "آكر" أو الجمع "أكرو" وإسمه فى صيغة الجمع يشير إلى معبودات آزلية للأرض أصولها الأسطورية غير معروفة وقد وردت الإشارة ليها فى بعض نصوص الأهرام

ويقوم المعبود آكر "الأسم المفرد" بفتح بوابة الأرض أمام الملك المتوفى لكي يعبر إلى العالم الآخر ولكى يحمى الملك عن طريق الإمساك أو كبح شياطين الثعابين "ابوفيس" او العبب التى تهدده ، وفى النصوص المتأخرة مثل "كتاب أكر" أو كتاب الأرض والمسجل فى مقبرة رعمسيس السادس فى وادى الملوك وكذلك البرديات الأسطورية التى ترجع إلى عصر الأسرة الحادية والعشرين ، فإن آكر كان يقوم بحجز أبوفيس  

ويصور آكر عادة فى هيئة كتلة مستطيلة تمثل الأرض ، ذات روؤس آدمية عند نهاية الطرفين تمثل مدخل ومخرج العالم السفلى 

وفى وقت لاحق بعد ذلك صور هذا المعبود بقدمتى أسدين ، و عقيدة آكر تعود إلى عصر بداية الأسرات ورغم ذلك ورغم ظهوره فى نصوص الأهرام إلا أنه ظل كإله كونى لا يوجد له مكان عبادة خاص به....................دا بالنسبة للمعبود 

وللعلم صاحب النظرية نطق الأسم خطأ "إكر" رغم أنه من أكتر الناس إلى تدقق فى أسماء الملوك دائماً ما طلع علينا وقال "توت عنخ إمن" مش آمون يا جماعة ، وهل إختلف توت عنخ إمن من آمون فى النقط وهل عندنا قاموس صوتى مسموع للمصرى القديم علشان نعرف تشكيل الحروف ؟؟ لا بس فى حروف مختلفة تماماً يستحيل الخلط بينهم مثل حرف ال(أ) وحرف ال(إ) وذلك لأن الأول يرسم صقد و الثانى يرسم ريشة و رغم ذلك نطق الإسم بالخطأ 

طيب و هو كان أيه الدليل على النظرية المبتكرة اللى بتقول انه هناك أم الهولة او أبو الهولة وما هى الشواهد على كدا؟؟  "لوحة الحلم" لتحتمس الرابع" مرسوم عليها أسدين أو إتنين من أبو الهول ، وبذلك إستشهد ليصبح ما هو ظاهر على لوحة الحلم هو "آكر" و أصل هم إتنين لكن لو واحد كان الأمر إختلف

طيب ما الملك نفسه ظاهر إتنين مأخدتش بالك ؟؟؟؟  

ماهو العادى لما ملك ينقش لوحة زى دى ويقدمها قربان لحور إم آخت لازم يقدمها على أساس إنه ملك مصر العليا والسفلى يبقا يتصور مرتين قدام أبو الهول "حور إم آخت" يبقا علشان كدا ظهر أبو الهول مرتين و يبقا كدا اللوحة مالهاش علاقة بقا ولا بآكر ولا  بشاكر 

والدليل على كدا إن تاج الملك نفسه إختلف فى آثناء تقدمة القرابين

لو الملك يقدم قرابين للمعبود "آكر" كان الأصح يصور نفسه مرة واحدة قدام المعبود "آكر" لأنه هو معبود واحد بيتصور بهيئة أسدين وبعدين زى ما قولنا من قبل إن "آكر" مصادرنا عنه فى العصر ده كانت ضعيفة ورغم إن عبادته كانت موجودة من فترة كبيرة منذ بداية الأسرات ولكن لما ظهر عندنا على شكل أسدين كان فى مقبرة رعمسيس السادس يعنى دولة حديثة ، طيب ما أبو الهول من عصر الدولة القديمة هل فى أى مصدر يقول أن "آكر" كان بيتصور على هيئة أسدين من عصر الدولة القديمة او من بداية عبادته ؟؟؟ سؤال يطرح نفسه 

يبقا عندنا دلوقتى حاجة جديدة لو ده طلع "آكر" ومش طلع "حور إم آخت" يبقا دلوقتى لازم يكون عندنا مييييين ؟؟؟ 

أم الهوووووووووووول 

أخيراً ظهرت 

طبعاً مش فى حاجة أسمها أم الهول بس دى مجرد تعبير مجازى أقصد بيه الأشارة لتمثال آخر لأبو الهول يكمل الثمة الأساسية للآخر من وجهة نظر صاحب النظرية ،،،، ماهو ممكن يكون فى آكر يا جماعة على شكل أسد واحد عادى مش شرط يعني للأسف المعلومة دى مش وصلت او مش كانت موجودة بس المهم كان فيه تمثال لأبو الهول تانى وحصلت صاعقة دمرته يبقا راح بح ، طيب هو كان منحوت فين و فين الحجارة بتاعته ؟؟؟ سؤال يطرح نفسه 

الصورة دى نشرها البعض على أساس إنها تمثال لأبو الهول آخر فى الصحراء الغربية او الصحراء البيضاء واللى فى الصورة ماهو إلا تشكلات صخرية لصخور الصحراء الغربية تأثرت بعوامل التعرية ن الطبيعة و الشكل إلى بقت عليه الصخرة دى بمحض الصدفة جاء على شكل أقرب لأبو الهول بس مش أبو الهول ولا اى دليل على أنه ابو الهول وهناك صخور عديدة فى نفس المكان ولها اشكال مخلفة  

وكمان الصحراء الغربية !!! ،،، مسافة بعيدة جداً على أن ممكن يكون المصرى ممكن يفكر حتى ينحت فيها تمثال أبو الهول ، طيب ما قرية نزلة السمان كانت فاضية ساعتها مش قاموا ببناء أو نحتوا ليه تمثال لأبو الهول فى المكان ده يقابل ابو الهول الحالى ؟؟؟ 

وكما قال الأديب نجيب محفوظ "ويبقى للحديث بقية" 

ورغم كل ذلك تبقا النظرية وصاحبها و ناقدها محل النقد من الجميع

وشكراً

مراجع تهمك

ص86 ، عبد الحليم نور الدين ، الديانة المصرية القديمة الجزء الأول الخاص بالمعبودات

ص18 ماريو توسى ، كارلو ريو ردا ، معجم آلهة مصر القديمة 

سليم حسن ، موسوعة مصر القديمة ، الجزء الثانى ، فى مدينة مصر وثقافتها فى الدولة القديمة والعهد الإهناسى

أدولف إرمان ، الديانة المصرية القديمة 

يتبع 

كتبه 

محمود إبراهيم 

MeeM